Det Norske Bransjemagasinet blir møtt av Linda Haddal Røssevoll når vi ein solrik haustdag kjem på besøk til Melshorn Hotell på Hareid. Eit steinkast frå ferjekai og hurtigbåt ligg det heimekoselige hotellet. Hotellsjefen er i dag resepsjonist, men er gjerne innom alle funksjonar eit lite, intimt hotell med særpreg skal innehalde i løpet av ein arbeidsdag.
– Det er ein livsstil å drive hotell på Hareid, smiler Linda og skjenker i kaffi til oss.
Sentral plassering
Med kort veg frå alle kantar av Sunnmøre, ligg hotellet veldig sentralt med tanke på konferanser og møter.
–Vi har hatt landsmøter, og mange bruker oss til både fylkesmøter og meir lokale møter, seier hotellsjefen. Med reiseavstand på under timen frå flyplassen på Vigra i Ålesund og Volda Ørsta Lufthamn, er det mange som ser på hotellet på Hareid som eit naturleg val for sine møter.
– Vi har alle fasiliteter for gode møter. I tillegg kan vi sy saman pakkar for den enkelte, opplyser ho. Dei fleste kundane til hotellet er likevel bedriftene og forretningsreisande i vekene.
Puben i kjellaren har vore leigd ut siste året, men har stor aktivitet i helgane. Ein gong i månaden er det også populær quiz på puben.
Oppgradering
Hotellet har fått fin oppgradering siste året. Både bad, dusj og toalett er nye og oppgraderte.
– Nye fjernsyn på 43 tommar er på plass i alle rom. Kanalpakken er også oppgradert, som i dag også inneheld populære fotballkampar, seier hotellsjefen. Ho veit at mange av gjestane likar å få med seg fotball på fjernsyn når dei sjekkar inn på Melshorn Hotell.
Restauranten er open på bestilling for selskap, bryllup, barnedåp, minnestund med meir, og hotellet kan by på alle rettigheiter i baren kvar einaste dag.
– Vi opnar gjerne restauranten til lag av alle slag, men må ha minst ein dags varsel. Dette for å få på plass personalet og råvarene vi treng, seier Linda. Ho tilpasser seg etter behovet, og likar å lage maten frå grunnen av. Dette gjeld også heimbaks til møter og konferanser.
– Til frukost er det egg frå frittgåande høner frå eigen heim, og honning frå faren sine bier! Meir nærmat er det vanskelig å få det, smiler Linda. Ho fortel at det naturlegvis blir egg og bacon til frukost, med nysteikte brød med grove og fine rundstykke på bordet.
– Vi ønskjer både nye og gamle kundar hjarteleg velkomne til oss på Melshorn Hotell, smiler hotellsjef Linda Haddal Røssevoll.
