Fjordvarmeanlegget gjev rein og fornybar energi både til verksemder, offentlege bygg og bustader i kommunesenteret Nordfjordeid. Så langt er 53 varmepumpeanlegg i drift. Samla bygningsmasse som nyttar anlgget til oppvarming og kjøling er på meir enn 90.000 m2. Kapasiteten til anlegget blir utvida våren 2017 gjennom bygging av eit nytt sjøinntak med tilhøyrane vekslarhus og tekniske installasjonar.
– Gode løysingar er no utvikla og tilgjengeleg for marknaden. Erfaringane frå planlegging, utbygging og 13 års drift på Nordfjordeid, gjer at det er enklare og rimelegare for andre å kome i gang med utbygging, enn det var for pilotkommunen Eid. Vi ønskjer å bidra til ei større satsing på fjordvarmeanlegg i dei mange byane og tettstadene langs kysten, seier dagleg leiar i Fjordvarme AS, Magne Hjelle. Han viser til at kommunar og energiselskap er sentrale aktørar for å kome i gang med store prosjekt i utbygde område. I tillegg kan eigarar av sjønære utbyggingsområde sjølve ta seg av utbygginga på sine eigedomar.
Nordplan AS er no hovudeigar i Fjordvarme AS, som held fram med å vere ein uavhengig rådgjevar. Fjordvarme AS leverer tenester knytt til prosjektadministrasjon, prosjektering og drift av energianlegg basert på fornybar energi, samt energibruk i bygg. Nordplan AS har også overteke Enøk-senteret AS. Vidare utvikling av tenester og kompetanse for Fjordvarme AS vil skje i samarbeid med Nordplan og Enøk-senteret. Samla er det i dag 10 energirådgjevarar i desse selskapa til saman.
Ta kontakt
Fjordvarme AS har eit nettverk av samarbeidsbedrifter som har vore med på pilotprosjektet, Fjordvarmeprosjektet på Nordfjordeid og andre prosjekt. Samla sett har desse bedriftene god kompetanse på alle fagomreåde, noko som kjem til nytte for andre utbyggarar.
- Det er berre å ta kontakt med oss, seier Magne Hjelle til Det Norske Bransjemagasinet. Han fortel at Fjordvarmeprosjektet er eit pilotprosjekt der tilgjengeleg teknologi er sett saman til ei omfattande utbygging for eit heilt lokalsamfunn.
- Tilskot til utbygging er eit viktig bidrag for å kome i gang med slike miljøprosjekt. I dag er det Enova som handterer denne ordninga for staten. Vi kan hjelpe utbyggarane med å søkje om tilskot, seier dagleg leiar Magne Hjelle.
Kompetansesenter
Svært mange tettstader i Noreg ligg nær ved ein vasskjelde som kan nyttast på same måten som Eidsfjorden i Fjordvarmeprosjektet.
-Prosjektet på Nordfjordeid kan difor vere eit mønsterprosjekt for andre tettstader, men det er viktig at prosjekta både blir tilpassa dei lokale tilhøva og den aktuelle utbyggaren som tek ansvar for utbygginga. Systemløysingane og grensesnitt mot kundane vil difor variere frå plass til plass. Dette vil føre til ei raskare omlegging til meir effektiv og miljøvennleg energibruk og større utbreiing av vassbaserte varmepumper på landsbasis.
Gode referanser
Fjordvarmeanlegget på Nordfjordeid, som Fjordvarme AS har drifta sidan 2004, er eit fullskala referanseanlegg for selskapet. Fjordvarme AS har også fleire referansar frå andre plassar, til dømes i Ulsteinvik på Sunnmøre og i Førde i Sunnfjord. På desse plassane har selskapet utvikla prosjekta gjennom forstudiar, søkt om Enova-tilskot og vore prosjektleiar i prosjekterings- og utbyggingsfasen, seier dagleg leiar Magne Hjelle.
Rekruttering
For å auke kapasiteten og kompetanse innanfor fleire typar fornybar energi, vil Fjordvarme AS rekruttere fleire tilsette framover. Dette gjeld også på VA-området, som er eit nærliggande fagområde.
-Vi har tru på at fornybar varme og kjøling frå sjøvatn vil vere ei riktig satsing i mange år framover, seier dagleg leiar Magne Hjelle. Potensialet er enormt!
